Viadie beih cha rua hlei leipa ta a ô liata sathaw chhao chhâ hra vei
(1 Abeizy 17: 16)
Hrohsopa Elaiza he Kilia râh liata Tisabi khihpa châ ta, ABEIPA bie hawhta Zawdâh kiahpâh liata Cheri vatiepa liana chata y ta, cha liana chata ra-awhzy ta my nata zâ ta a niepa nata do awpa pie tyh ei ta, cha râh liana chata a vâ rai a suah leipa vâta chavah cha kua haw ta.
ABEIPA bie cha Elaiza hnohta vaw tlô heih ta, “Sidaw râh liata Zerepha khih lâ ta sie la, cha liana chata y teh.” (17:9) tahpa ta. Sidaw râh he Zenitaizy pahrâna supipa; Khazohpa a pahno lei penawhzy yna châ ta, Cheri tawhta me 80 – 90 likawh â hlapa a châ. Abeipa ta, Elaiza hnohta, ano pasa awpa ta nôhmei pakha bie a pie hawpa
chho ta. Chatanachata, Elaiza cha thyu ta, Zerepha khih lâna cha sie haw ta. Kha nota nôhmeipazy cha chyhsa rietheipa châ ei ta, chakâhna daihti liata nie-baw a phahla tua chaipazy ama châ tyh. Abeipa ta, nôhmeipa, ano â ngiapâ leipa bailai hnohta Elaiza y awpa a tah thlâh hapa he ta, Ano bie zyh ta, A bie hawhta a taotuhpazy cha nie nata do ama ngiahna daihti lia maihta, a y leipa tawh chhaota a pie theituhpa a châna a phualuah khohpa vâta nata thlahpa lâ mo pavâna a pie khohpa vâta a châ cheingei nata pangiasa â chhih.
He daihti liata Zerepha nôhmei hnei chhôhpa cha, beih liata viadie paza kha, a ô liata sathaw a chyhta deita nata tho pahrei miano tlyma deita a châ. A hmo hneipa a mâh-muapa tawhna heta chyhsa riethei kawpa a châ tahpa pahno theipa a châ. A phahla kawpa duasu liata a duahpa châ hrasala, Khazohpa Hrosohpa rei a ngiah ta, tao awpa a tahpa cha riahpha kawpa ta a tao (17:15). A pie pasaina vâta, chakâhna a tlô ngâ kawno chhaota a Viadie beih cha rua hlei leipa ta, a ô liata sathaw chhao chhâ hra vei tahpa eima pahno. Hlazy 37: 19 liata chyhsa siapazy cha, “daihti pha leipa liata maophyuh leipa aw ei ta, chakâh kôzy chhaota ama hnei thlu thlâh ha aw.” a tahpa kha he nôhmeinô chô liana heta a tlô pado ngâsâ.
Zerepha nôhmei cha, a sawchapawpa nata ano ama nie hlâta Elaiza châ ta nie’pa a patohpatia tuapa vâta, chakâh nota niepa a phahla leipa ta (châh 16), a
thlahpa mo chhao a pavâh pâ haw (châh 24) tahpa eima pahno. Cha hawhna hra chata, keimo chhao eima nie awpa eima patohpatia tua hlâta, Abeipa ta thlahpa leidiapazy pachha nawpa ta chakaona rai rôhna ngaita kawpa eima o chhôh tawhta hria thei awpa maniah a piepa beihpari he hmia pasa ei sih la, nie-baw eima patohpatiana kyh liata a byhnâ khochhih ngaita kawpazy eima to via lyma thei nawpa nata thlahpa lâta mo pavânazy eima vaw hnei via lyma thei nawpa ta, ku riapha ngaita kawpa nata aly ngaita na chôta beihpari he Khazohpa khihna râh kawna châ ta soh via lymâ ei suh u.
“Elaiza hmâpa ta a reipa ABEIPA bie hawhna khata viadie beih cha rua hlei leipa ta, a ô
liata sathaw chhao chhâ hra vei.”
Abeipa ta a bie byhnâ pie mawh sy. Amen
B. Zihlua
